Conto sisindiran

SISINDIRAN

Sing getol nginum jamu

Nu guna nguatkeun urat

Sing getol neangan elmu

Nu guna dunya akherat

Bi ilah mawa lilin

Dibikeun ka Mang Dodo

Ulah sok loba ulin

Bisi jadi jalma bodo

Ema keur Ngumbah piring

Dibantuan ku teteh ngan sakeudeung

jadi jalma kudu eling

sabab hirup teh ngan sakeudeung

Kamana jalan ka Jogja

Kaditu ka palih wetan

Kamana jalan ka surga

Kaditu ka pangajian

Urang ge hoyong ka jogja

Yuk urang angkat ka palih wetan

Urang ge hoyong asup ka surga

Yuk urang angkat ka pangajian!

Cau naon cau naon

Cau kulutuk di juru

Bau naon bau naon

Bau hitut nu dijuru!

Aya manuk dina pager

Na sukuna aya bola

Lamun urang hayang pinter

Kudu getol ka sakola

Materi Sisindiran

Sisindiran

Sisindiran téh asalna tina kecap sindir, anu ngandung harti omongan anu teu langsung.

Dina sastra sunda anu disebut sisindiran téh nya éta karya sastra anu ngagunakeun rakitan basa kalawan dibalibirkeun.

Sisindiran dibagi jadi tilu golongan, nya éta:

1. Rarakitan, cirina kecap nu dihareup sarua.

                             Conto: lamun urang ka Cikolé,

                                        Moal hésé tumpak kahar.

                                        Lamun urang boga gawé,

                                        Moal hésé barangdahar.

2. Paparikan, cirina sora ditukangna wungkul nu sarua.

                        Conto: Aya meri dina rakit,

                                    Boboko wadah bakatul.

                                    Lain nyeri ku panyakit,

                                    Kabogoh direbut batur.

3. Wawangsalan, nya éta karangan anu diwangun ku sindir jeung eusi. Cirina, kalimah kahiji nunjukeun panuduh(petunjuk), dina kalimah kadua aya kecap nu mirip jeung jawaban nu dimaksud.

                                    Conto: Béas ditutuan deui

                                                Iraha atuh patepung

                                                                                    Wangsalna: tipung

Sisindiran diwangun ku cangkang jeung eusi. Dua kalimah diluhur disebut cangkang, dua kalimah dihandap disebut eusi.

Numutkeun eusina sisindiran dibagi kana tilu golongan, nya éta:

1. Piwuruk (naséhat)
2. Silih asih (kasmaran, menyayangi)
3. Sésébréd (humor/ bodor/ banyol/ lulucon)

1. Conto sisindiran nu eusina kaasup kana piwuruk:

Kanikir siki kanikir,

Cangkudu beunang panimu.

Kapikir beuki kapikir,

Hirup kudu loba élmu.

2. Conto sisindiran nu eusina kaasup kana silih asih:

            Lampuyang nu cocongoan,

            Bawaeun ka Rajagaluh.

            Ku hayang nya sosonoan,

            Isuk mah urang pajauh.

3. Conto sisindiran nu eusina kaasup kana sésébréd:

            Cau naon cau naon

            Cau Kulutuk di juru

            Bau naon bau naon

            Bau hitut nu dijuru